Dahil Sayo, Para Sayo

God: Sa wakas, nagkita na muli tayo.
Kasabay ng mga ibon na humuhuni,
naririnig ko ang boses mo.
Sumikat na muli ang araw na matagal nang nagtatago sa kadiliman.
Muling pumintig ang puso na matagal nang nanabik sa iyong pagbalik.
Paulit ulit na binibigkas sa aking mga labi na mahal kita.
Mahal kita.
Tama ang iyong narinig,
Mahal kita.
Simula pa lang ng iyong unang paghinga sa mundo,
Minahal na kita.
Hanggang ngayon
Mahal pa rin kita.
Sister: Matagal ko ng alam ang tungkol sayo.
Alam kong kasama kita sa lahat ng oras, naghihintay at nagmamatyag.
Nagtatanong kung nasan na ko, kung mahal pa ba kita o bakit ako lumayo.
Hindi napapagod para lang maramdaman ko ang tinatawag mong pagmamahal
ALL: Pagmamahal
Brother: Na handang ibigay ang lahat kahit ubos ka na.
ALL: Pagmamahal
God: Na hindi magbabago ngayon, bukas at kailan pa man.
ALL: Pagmamahal
Sister: Na hindi magtatanong ng bakit at paano kundi iintindihin ang bawat bakit at paano.
ALL: Pagmamahal
God: Na hindi magsasawang ipaalala sayo na mahal kita at ikaw ay mahalaga.
ALL: Pagmamahal
Brother: Na laging uunawa kahit mahirap unawain
ALL: Pagmamahal
God: Na kayang tiisin ang bawat hagupit ng latigo saking mga katawan
ALL: Pagmamahal
Sister: Na Hinding hindi ka iiwan
ALL: Pagmamahal
God: Na handang yakapin ang krus makita ka lang masaya.
ALL: Pagmamahal
Brother: Na handa kang palayain kahit ang hirap hirap
ALL: Pagmamahal
God: Na handang magpapako at mamatay para sayo

Brother: Minsan na akong nawala.
Hindi alam kung saan patungo ang landas na tinatahak.
Sinubukan ang lahat para lang maging masaya.
Pero patuloy na nabigo dahil walang nakuhang ligaya.
Hindi ko alam kung bakit ako nananatili dito
dahil ang alam ko ay matagal na akong iniwan ng mundo.
Napapagod na ako na tumakbo papalayo sa buhay na hindi ko ninais.
Pagod ng maniwala sa pag-asa at pag-ibig
dahil kung totoo man yan ay bakit andito ako sa kawalan.
Pinipilit ko na maging malakas sa mata ng maraming tao
dahil sabi ng mundo, hindi raw umiiyak ang tunay na lalaki.
Naranasan kong masukat sa kung anong kaya kong ibigay
pero wala bang nakaisip na ubos na ubos na ko.
Palaging may dapat patunayan ang pusong nadudurog na.
Palaging hindi sapat ang sapat na para sakin.
Hanggang kelan ako maghihintay
na matanggap ng mundo
ang pusong malapit nang bumigay.
Gusto ko na sana sumuko pero ikaw ay natagpuan.
Simula ng magtagpo, nagbago ang lahat.
Naramdaman ko kung paano mahalin at magmahal.
Sinamahan mo kong talikuran ang mundo at
pinatunayan sakin na ang pagmamahal mo ay wagas.
Naramdaman ko na sa mga mata mo na ako ay di patapon,
na ang mga plano mo para sa akin ay maganda.
Pinulot mo ako mula sa basurahan
Para maipwesto sa iyong kaharian.
Niyakap mo ako ng mahigpit para
hindi na makaramdam ng sakit.
At sa tuwing nanghihina ako,
Pinatunayan sakin na mas malakas ka.
Mas malakas pa sa mga alon ng dagat.
Ikaw ang sandigan, sandalan at sandata ko,
sa laban na alam kong matagal mo ng ipinanalo.
Salamat sa pagpapatunay na Ikaw lang ay sapat na.
Sapat na para hindi mangamba
sa mga bagay na walang kasiguraduhan.
Salamat dahil minahal mo ako ng paulit ulit at walang kapaguran.
Dahil Sayo, Para Sayo, Ang iyong anak ay handa ng lumaban.

Sister: Mahal kita pero pagod na ako.
Minsan na akong nagkamali sa pagmamahal.
Maubos na parang kandila, matapos maibigay ang lahat.
Naranasan kong hindi maging sapat sa mundong puno ng pag-aalinlangan.
Kinalimutan ang sarili para lang makapasok sa kagustuhan.
Pero katulad ng karamihan, ako ay nabigo.
Minsan pala hindi sapat ang salitang “mahal kita” para manatili
dahil kagaya ng iba ay iniwan mo rin ako.
Akala ko ba walang iwanan,
pero bakit naiwan akong mag-isa
Kaya ko pa ba?
Tinatanong ko ang sarili ko kung kaya ko pa ba,
Na magmahal at magbigay kahit ubos na ako.
Kaya ko pa ba na hindi bumitaw
kahit ang sakit sakit na.
Kaya ko pa ba na manatiling maniwala
kahit ako ay puno ng pagdududa.
Paulit ulit akong tumitingin sa kalawakan
pero hindi ko na matanaw ang mga bituin
na sinabing susungkitin para sa akin.
Siguro nga hindi na ako dapat umasa pa
Na maramdaman mahalin ng buong buo
At walang hinihintay na kapalit.
Siguro hanggang dito na nga lang ang pusong pagod.
Pagod nang maghintay at umasa sa magandang istoryang itinakda para sakin.
Pero nagbago ang lahat simula
ng muling magkrus ang ating mga landas.
Paulit ulit na binibigkas ng mga bibig mo na mahal mo ako.
Minahal mo ako, at
Mahal mo pa rin ako.
Hindi nagbago ang pagmamahal mo para sakin.
Hindi mo ko binitawan kahit matagal na akong hindi kumakapit.
Patuloy kang naniwala sa atin,
Sa ikaw at ako.
Sa istorya natin dalawa.
Kung saan hindi mo ko iniwan,
kahit sa mga panahong akala ko wala ka na.
Pinakita mo sa akin kung gaano ako kaganda sa iyong mga mata.
Higit ang pagmamahal na kaya mong ibigay sakin.
Mas higit sa kung anong kayang ialay ng mundo.
Dahil Sayo, Para Sayo, Ako ay magmamahal na ulit.
God
Mahal kita.
At ang totoo ay hanggang ngayon mahal pa rin kita.
Hindi kailanman nagbago ang pagmamahal ko sayo
kahit ikaw ay ilang beses ng lumayo.
Naaalala mo pa ba noong unang beses kang tumayo sa youthcamp.
Kung saan sinabi mo na ako ay mamahalin ng buong buo.
Masaya ang bawat minuto na meron tayo
at damang dama ko ang bawat pintig ng puso mo.
Pero bigla kang nagbago,
simula ng maramdaman mo
na hindi ako sapat sayo.
Ang bawat pangako ay kinalimutan
dahil masaya ka na kasama ng iba.
Akala ko ba sapat na ako sayo
ngunit bakit bigla ka na lang umalis.
Pero wag kang mag-alala
dahil andito pa rin ako.
Naghihintay pa rin sa pagbabalik mo
At sabihin na mahal kita anak.
Walang distansya ang kayang magpalayo sa ating dalawa.
Patuloy kitang hahabulin
Kahit gaano man kalayo ang tatahakin.
Patuloy akong mangangarap para sa atin.
Dahil naniniwala pa rin ako na merong tayo.
Na ikaw at ako ay iisa.
Sa isa pang pagkakataon, samahan mo ako.
Ipapakita ko sayo kung gaano kaganda ang mundo.
Kung gaano kasarap magmahal.
Ikaw ay ang pinakamahalagang parte ng aking buhay.
Papatunayan ko sayo na hindi kita iiwan.
Iwan ka man ng mundo ay
mananatili akong nakatayo para sayo.
Para sayo, kahit gaano kabigat na krus ay kayang buhatin.
Dahil ito ay hindi krus ng pasakit
Kundi ito ay krus ng pangako na hindi ka na ulit mag-iisa.
Dahil sayo, para sayo; mananatiling matibay.
At sa huli ang isisigaw ko ay mahal kita. Ngayon, bukas at kailanpaman.

Sister: Ngayon, Bukas at Kailanman
Handa na akong magmahal.
Dahil alam kong hindi mo ako iniwan.
Kasabay ng mga awit ng anghel sa langit,
Isisigaw ko kung gaano kita mahal.
Mahal kita at hindi na magbabago yun

Brother: Ikaw ang kasiguraduhan ko.
Ang lunas sa bawat sugat ng kahapon.
Ang ligaya sa bawat hapdi.
Ang pahinga ko sa kapaguran ng mundo.
Pinatunayan mo na ako ay hindi kapalit palit sa puso mo
At pinalaya ako sa ingay ng mundo.

God: Para sayo, gagawin ko ang lahat.
Walang anuman laban ang hindi ko kayang ipanalo para sayo.
Wala kang dapat ipangamba,
Dahil ako ay higit pa sa matataas na alon na iyong nilalangoy.
Ang mga bundok ng mga problema ay matagal ko ng pinatag.
Dahil sa lahat ng hirap at pasakit,
Ikaw ang pinakamahalagang premyo.
Sa iyong pagbalik ako ay nagwagi,
Sa isang laban na hindi ko sinukuan.
Dahil sayo, Para sayo, mamahalin ka ng habambuhay.

Brother: Dahil Sayo, hindi na muling maliligaw!
Sister: Para Sayo, hindi na ulit lalayo pa!
God:Dahil sayo, para sayo, hindi na muling mag-iisa!
Brother: Ngayon di na muling magdududa.
Sister: Lahat tayo ay mahalaga
Brother:
Ikaw ay maganda!
Katulad ng kagandahan ni Maria
Sister: Hindi ka mahina
Dahil ikaw ay mas malakas pa sa mga leon sa kagubatan
God: Ako’y mananatili at hindi matitinag sa pagmamahal sa inyo.
Kayo ang dahilan kung bakit andito pa rin ako at hindi sumusuko na mahalin kayo
Brother: Ikaw ay kamahal mahal
Hindi lang dahil sa kung anong meron ka kundi dahil sa iyong kabuuan.
Sister: Hindi ka talunan
Dahil ikaw ay nanalo na simula ng isuko ang lahat para sa Diyos
God: Ako ang unang nagmahal sayo at walang hanggan na magmamahal sayo.
Brother: Hindi ka nagkulang dahil ikaw ay higit na mahalaga sa kung anong kaya mong isipin.
Sister: Hindi ka duwag dahil ikaw ang isa sa pinakamatapang na anak ng Diyos.
God: Kahit kailan hindi ako nagkamali na piliin kayo dahil kayo, kayo ang
pinakamahalagang prinsipe at prinsesa sa aking kaharian. Maniwala ka, habang buhay kitang sasamahan.
ALL:
Hindi malilimot, hindi magbabago.
Dahil Sayo, Para Sayo.